Во очекување на македонските верзии на лиценците за креативно заедничко или заедничка креативност (хе :)), да запишам само дека Creative Commons ја издаде верзијата 3.0 на лиценците. Врска.

„Во последно време, растечката популарност на Creative Commons лиценците е проследена со растечко критикување. Приговорите можат да се сведат на следниве поенти: Creative Commons лиценците се фрагментирани, не дефинираат минимален заеднички стандард на слободи и права кои им се даваат на корисниците и дури не успеваат да ги исполнат критериумите за слободни лиценци и за разлика од движењата за слободен софтвер и софтвер со отворен код, тие следат филозофија на зачувување на правата на сопствениците на авторските права наместо тие да и се доделат на публиката. Сепак, ќе биде премногу едноставно само да се обвини организацијата Creative Commons за овие прашања. Со тоа што не успеале да ја постават својата агенда и компетентно да се произнесат што сакаат, артистите, критичарите и активистите имаат свој удел во нередот.“, започнува Флориан Крамер во својот (долг) текст на nettime-l кој говори за недоразбирањата околу Creative Commons лиценците.

Оваа последната реченица е можеби најзначајна за нас овде во Македонија иако артистите, критичарите и сличните многу-многу не ги засега ова прашање.

Во ситуација (реалност) кога многу малку се знае за авторските права и нивната суштина, опасноста за Creative Commons лиценците во Македонија лежи во можноста тие да станат само една лепенка на различна содржина која се појавува на интернет, или моден тренд на шизичките блогови, или бренд кој може да се користи за мачкање очи.

Текстот на Флориан е долг и има долга дискусија под него и има многу фусноти... веројатно нема многу луѓе да читаат, но за оние кои барем малку се заинтересирани го препорачувам минимум текстот на Бенџамин Мако Хил - „Кон стандард за слобода“.

Мотив за овој запис на блогов:

Метаморфозис почнале да работат
на македонските верзии на Creative Commons лиценците и се здружиле со Темплум и Контрапункт во промовирањето на истите.

Референци за Интернет содржина на македонски јазик, a во врска со темава:

Блогови каде што се споменува Creative Commons или Криејтив Комонс.

Блогови лиценцирани под некоја CC лиценца, на сервисот blog.com.mk и цел .mk простор каде што се споменува истата реченица.

Creative Commons издаде нова лиценца која се однесува на земјите во развој, поточно на авторите кои живеат во земјите во развој (како Македонија). Лиценцата им овозможува на авторите да дозволат нивните дела со големи слободи да се користат во земјите во развој, додека во развиените земји би се применувале стандардите услови на законите за авторски права (се разбира, освен ако авторот не одлучи поинаку).

Мислам дека нема што многу да се објаснува многу околу ова. Доколку оваа лиценца фати моментум, земјите во развој ќе можат многу полесно да соработуваат меѓу себе без да се плашат дека нивната интелектуална сопственост ќе биде потценета од развиените.

Инаку, одамна мислам да напишам нешто повеќе за Creative Commons, ама никако да стигнам. Па да ја искористам приликата да ве упатам на 2-3 врски плус:

• Листа на сите Creative Commons лиценци;

• Хрватска иницијатива за Creative Commons лиценци на хрватски јазик;

• Лесна форма за избирање лиценца која ќе одговара на вашите потреби.