Новите скопски автобуси се вообичаени на линијата бр. 4, која пак е мојата најблиска линија за да стигнам во „град“.

Вчера автобусот доцнеше 10 минути. Фактот што беше нов не помогна во почитувањето на возниот ред.

Всушност квалитетот на јавниот градски превоз најмалку зависи од амортизираноста на автобусите што се користат.

Во случајов, за на крај сепак да стигне во Кисела Вода на време, возачот мораше да вози брзо, да не застанува доволно долго на автобуските станици и воглавно да создаде непријатно патничко искуство.

Се разбира, за ова можеби најмалку е виновен возачот, бидејќи во градот нема или не се почитуваат посебните ленти за јавен сообраќај, има големи гужви на определени крстосници и така натаму.

Новите автобуси во оваа смисла се само шминка за, во секоја друга смисла, лошиот јавен превоз.

Не дека ова не можеше да се заклучи и порано, но сега, кога споредбата со другите е поедноставена, сето е поочигледно.